Heint will ich mol fun unsre Jugend vrzele,

des tut mr arich gern wemr äldr werd. Also, wimr aus dr Schul kumme sin, hot mr glei zudr großa Madle zelt, to hen sich Kumradschafte zamgschtelt. No simr a pal tanze gange, an dr Oschtre odr Kirwi "simr eigschtande".

Ich fang mol mit dr Kirwi aa. In alre Herrgots Fruh hotmr ufschtee misse, daß mr jo fertich isch bis d´Gäscht kumme. Mir hen alweil Gäscht krigt, mei Bäsle un Vettre mit Kindr vun Towarisch. Manchmol waare´s drei Wäge. To isch Tschastiert" waare, to hots schun in dr Fruh Paprikasch un Wei gewe. Mei  Großvatr isch aa schun in alre Herrgots Fruh mit dr Bartbindi rumgschtirmt bis ´s endlich mol losgange isch.

Unsr Kirwi war am 29.Juni, an Pedr un Paul, to war´s manchmol schun stark haas. Mir wahre 8 Kumradine: Orth Resi, Manz Leni, Orth Nani, Wischt Kadi, Schwerer Resi, Wischt Resi, Bertran Leni und ich, d´Manz Kadi. Mir hen uns

scheen aazoge, no simr gschtrazt int Kirich, die war weit, grad am andre End vum Darf, tohemr viel frezele kenne bis to nuf. An dr Kirich war schun dr großi Fohne haus gschtande, der war soo groß, do hen sechs Buwe trage misse beim Umgang. ´s war a scheenes Hochamt, un  weil Batsch dreisprochich war, ware die Messe a jedr Sundag, in anre andre . Die Prozesjon isch um die Dreifaltigkeit gange un widr zruck int Kirich.

Wie´s Amt aus war, simr iwr die Kirwi Marik gloffe, a bißl Zuckr kaaft, no simr Haam gschtrazt, daß mr die gschteifte Reck rundr kriege, ´s war jo als so starik haas, to hemr als gschwitzt. Noch´m Mittagesse hot mr jo schun widr ans aazige denkt, weil mr uns jo wiedr troffe hen "zum tanze".  Zerscht sint Seidestrimpf un die Schuh draa kumme.

Des war a Ploog, "die Schuh", die Fieß ware jo so ufgwolle, weil mr Wertags Pepula, un ufm Feld Patschker aa khat hen. Uno Sundags die maasgfertichte Schuh, ja to kamr ner sage "Elfrtritschr Fieß un Parisr Schieli". Mir hen schun

scheeni Schuh ghat damols, Lackschuh, Wildledrni, Uffeni un mit Korkkeilabsätz. Wen ich no als garnit in Schuh nei khumme bin, hawich ´t Lavur gnumme, kaldes Wassr und ´t Fieß nei gschtelt, no wars a bisl bessr.Heint hemr unsr Lackschuh unsr krecksichi aazoge, no sint Reck traa khumme:
2 flatrichi, 1 grob gfeltlr un 2 fein gfeltlti, no ´s Owrgwand, heint hemr a scheenes seidenes aazoge, in alne Farwe hot´s di gewe. Zum Tanze aa ware mi so schtrazich un scheen kamblt, die Zepf mit Haaarnodle fescht gschteckt, 4 odr 6 Baaneni noch drzu mit Straßstaanle un a großi Haarspang in dr Mitte drin, mir ware jo so stolz an schtrazich, heint sage sie "gestylt". Des ware mir schun far 60 Jahr, wemr so will.

A Sacktiechl hemr alweil drbei khat, wemr furt gange sin. Zum Tanze hot mr noch a paar Dinar mit khat, far Eintritt un far a Eis odr a Krachl odr Himbeersaft. Des Eis bei´s Gawrele Marisnéni war jo so stark gut, des gschpier ich hent noch

uf dr Zung. Wie mir in s Wirtshaus khumme sin - mir hen beis Gawrele tanzt - wie mr nei khumme sin, hot uns schun dr Pfedrfettr in Empfang gnumme, jetz steht der jo aa so "gstylt" un dr Bart zwirwlt, der isch sichr aa dr ganzi Marge mit dr Bartbindi rum grent. D´Kadibäsl hot derweil gschtrajt im Tanzsaal. Die Buwe hen manchmol keglt odr Biljard gschpielt bis ´s Tanze aa gange isch.

Ja, unsr Buwe, die ware jo aa so scheen aazoge. S´undrscht war´d Gadjrhoß "awr no", die hen Gwandr khat aus englischem Stoff un maasgschneiderti Anzig, scheeni Hemetr. Un ´s Kadis Nannibäsl hot die Kräge gschtärkt unbegelt, die hen so glanzt, die hen ihre Kepft ghebt "mei liewr" awr wegrem gschteife Kraage. Glatt palwiert un so scheen kamblt, dr Schadl graat wie mit anre Schur zoge, di sin glege wie mit Pomadi gschmiert. Un Schuh noch Maas, mit Lackkappe farne druf un Gänszähnle umundum, aa ware die so scheen mit ihre braunbrennte Gsichtr un ihre hart ausgarweti Händ. Meh hodmr nit gsehne, die hen ka Sonne-Studio braucht odr Fittniszentr. Die hen andri Geräte khat, dr Pflugkarre, d´Senz odr d´Mischtgawl, ha, die ware fitt, un wie die fitt ware, jung un aan schenr wie dr andre.

Awr mir Madle hen aa Kraft khat, jung u kräftich, heint sagt mir "Power" drzu. Un neigirich uf die Pussle und wie des so weidr geht. Hosch dich nit riere derfe "az apát nekid nochemol" to hot´s alweil ghasse "derf mir nit, tut mr nit, sol mr nit" und mir hen brav kharcht, des hosch damols so misse. Beis Gawrele im Wirtshaus isch mr zerscht int Wirtsstub khumme, no int Buwestub, no in Tanzsaal. Die Musich war glei andr Buwestub rechts, went naus khumme bisch. 

Mir Madle sin am andre End owe im Halbkranz gschdande.Wen die  Musich aagfange hot, "o Jesses", not war was loß! Die Buwe sin rei gschprunge, daß sie jo des Maddl griege, was sie welle. Des isch jo vun dr Muttr feschtglegt waare, wer die erschte 3 Tänze draa khummt. Bei uns Madle war´s so, zerscht dr Gschmuckl, bei dr Buwe war´s Mensch, no Gschwischtrich, not Freindschaft, no Stuwemadle un so weidr. Die Madle wu nit tanzt hen, hen Kalich plickt, hot mr gsagt.

So uma 5 - 1/2 6 Uhr simr haam gange fudre un Znachtesse. Um 8 Uhr isch´s jo wiedr aagange bis in dr Nacht um 12 odr 1/2 1. Oh, mir hen doch nanit haam welle un hen gwart bis mol endlich aan "weidr" ruf, "die wahre Zäh", weil beim "Weidr-Rufe" hen sie dr Musich 5 Dinar gewe misse. "Weidr" grufe hen sie mit ihrem Mensch odr wen sie´s werre hot solle odr wen sie gut tanze het hkenne mitnand odr wen dr Wei zu stark war. Manchmol war´s aa Tanz, manchmol a garkaan.

Aawr am Kirwi Montag hot mr meischtns Gerscht abgmacht und mir ware iwrnächtich un manchmol wars soo stark haas, to hemananit gwist, daß mr sage kann "ich hab null Bock" un no niks arwede brauch. damols hots so aa Wart nanit gewe, schaad.

No isch dr Schnitt khumme, ´s Dresche un ´s Hampfreeze. Ja, vum Hampf wer ich eich noch a bisl vrzele. Die Weibsleit hen im Windr Hampf gschpunne far hämpfenes Tuch. Des isch alles handgwebt waare, far Leintichr, Strohsäck, Handtichr un farsel Schnittrhem un Hose far unsr Mannsleit. Des soll scheen kihl gwest sei im Summer. Das Tuch far die Hoose isch bloo gferbt wahre. Des sol mr nit glawe, was so a klans Fleckl Ledr hinde druf ausmacht "Levi´s Jeans" steht druf, wens aus Amerika khummt, die hensi alweil aa, ob Summr odr Windr, ob gut odr franzlich. Unsr Mannsleit hen sie im Schnitt un im Hampfwassr aaghat. So endre sich die Zeide. No isch´s Kuckruz-Breche khumme un´s Trauweleese un so gschtad isch dr Windr khumme.

No war die Zeit zum Oweds furth geh, des war fas uns Ledichi die schenscht Zeit im ganzen Jahr. To war die Kumedi groß. Am 25. November war "Kathrein, stell die Geige ein". Des war dr letschti Tanzowed var Weihnachte. No isch Oweds furt geh khumme. Mir sin jedr Owed furt gange un jeds mol zu anre andre, "d´Raaj" hemr gsakt. No sin a Buwe drzu khumme, des waare unsr "Stuwe Buwe", s´waare als 12-14, nit alweil gleich. Un draus hen sich aa noch a paar

Vokosche rumtriewe. Des wahre Spitzbuwe, die hen alles aagschtelt, Tiere (Türen) zubunde, tr Wassrambr n die Tier bunde, wemr ufgmacht hot, isch´s ausgleert, un alles frstecklt was nit aagnaglt war.

Unsr Buwe wahre: Mit meinem Mann fang ich aa, Eichinger Steff, Manz Klaas, Drach Jaksch, Bertran Nicklos, Bertran Sepp, Schwerer Hans, Supp Joschi, Neumajer Sepp, Orth Hans, Drach Lorenz, Drach Sepp, Legler Hans, Ams Stef, Eichinger Matz, Schwerer Sepp.

Oweds furt simr um 6 Uhr gange un um 9 Uhr haam. Des war jedr Owed gleich. Manchmol wars so stark kalt, dr Schnee hot kracht wemr gloffe isch un glizrt wie Sternle. Mir hen als schun gwart bis endlich mol 6 Uhr war, daß mr furt hen kenne. Meischtns hot mich ´s Manz Leni abgholt, so simr gange mit dr Flatut, weil´s gar so dungl war. Unsre Buwe sin aa khumme, taal hen Karte gschpielt, taal hen kiwizt. Mir Madle häde gschtickt, wemr Ruh ghat häde.

Awr wie die Petroleumlichtr mit dr Zilindr gewe hot, to war erscht a Zirkus. Die Pelzkappe sin  hie und heer gfloge bis dr Zilindr hie war. Ja no wars dungl wie in anre Kuh. Ja, mr sols nit glaawe, wie viel Händ to ufamol bei khumme sin vun iwral, hosch gmaant, ´s hot a jedr vieri, die hen uns vrhurwascht. Manchmal hen ´t Zepf nimi khept, mir wahre froh, wen´s Licht aagange isch.

Mir hen jo als hie und heer iwrlegt, wie kente mir mol uf dene Buwe ihre Schooß khumme. Aaawr no isch´s uns eigfalle. Mir spiele "Werkstad rittle dich". No mus mr jo uf dr Buwe ihre Schooß sitze. Des hemr amol ausbrowiert, awr des war niks, die hen jo a haufe Wese in ihre Hosesäck khat: Tuwaksduß, Reibpfelzl, Flatut odr gar dr Hulackr - odr was des war. Frier ware die Pussle rar, des were nr jo alli wisse. Des war schaad, heint isch des andrscht. Awr heint hawich mich traut, ich hab ne gholfe, heint hawich sie alli verpusslt, awr des kamr frgesse, des ziegt nimmi.Drhaam hot´s a viel Sitte un Gebräuche gewe. Aans drfuh war, in dr Nacht zu Palmsunndag hen die Buwe d´Melkstiehli vrstecklt, wenn si aans gfunde hen. In dr Nacht varm Pfingschtsundag hen sie dr Madle Stroh gschrajt uf dr Gaß, "unwie" uf dr Gaß verzetlt bis an Grawe un uf´t Bääm gwarfe. Wie si des do nuf brunge hen, waas ich nit. Bei uns grad niwr beis Gaugese war a klans Schewerli Stroh hinde im Hof gsesse, to hen sie 2 Stange drundr gschowe un glei´s ganzi furt gschlebt.

Ha, mei Großvatr war a Spitzbub. In dere Nach hotr owacht gewe un hot sie gheert. Er hots Fenschtr gstaat aufgmacht un dr Kuntagstecke naus gschtreckt. Die hen gmant, des isch a Gwer, die sin graast, do werdr glacht hawe. Ich maan grad ich sign jetzt noch. In so anre Nacht hen sie mol bei Neumajers Lisi des Gassebängle beim Kolmann uf dr Baam nuf. Bei manchne hen si dr kurzi Wage ausenand gmacht un wuandrscht ufm Dach zamgschtelt.

Laudr so Sach isch denne eigfalle in dere Nacht. Un mir hen kenne fruh ufsteh un Gass khere, went Leit ind Kirich gen das sauwr waar.

So, jetz hot mei vrzeles a End. Es gibt noch soo viel Sach wu ich vrzele kent, awr des mach ich s´nechschtimol.

Adje !